३० भदौ ०७४, काठमाडौं । नेपाल आर्मी क्लवले सैनिक मुख्यालय भद्रकालीमा अन्तर्राष्ट्रिय स्तरको एथ्लेटिक्स ट्रयाकसहितको फुटबल मैदान निर्माण सम्पन्न गरेको छ ।
शुक्रबार मैदानको उद्घाटन प्रधानसेनापति राजेन्द्र क्षत्रीले गरेका थिए । फुटबल मैदानमा पहिलो खेलका रुपमा प्रधानसेनापति ट्रफीको फाइनल अन्तर्गत १६ नम्बर बाहिनी र पश्चिम पृतनाबीच फुटबल खेलाइएको थियो ।
गत वर्ष मंसिर आठ गते शिलान्यास गरिएको रंगशालाको अन्तर्राष्ट्रिय स्तरको प्याराफिटसहितको रंगशाला नेपाल आर्मीले करिव १० महिनामा निर्माण सम्पन्न गरेको हो ।
१० लेनको एथ्लेटिक्स ट्र्याकमा अन्तर्राष्ट्रिय मान्यता र नियम अनुसारको सेन्थेटिक म्याट प्रयोग गरी निर्माण गरिएको सेनाका एथ्लेटिक्स प्रशिक्षक पुष्पराज ओझाले बताए । यस ट्र्याक पछिल्लो प्रविधि र इन्टरनेशनल एशोसियसन अफ एथ्लेटिक्स फेडेरेसन (आइएएफ)बाट मान्यताप्राप्त कम्पनीबाट झिकाइएको ओझाले बताए ।
त्यस्तै आर्मीका प्रवक्ता झंकार कडायतले अखिल नेपाल फुटबल संघ एन्फाले प्रस्ताव गरेको खण्डमा अन्तर्राष्ट्रिय खेलका लागि रंगशाला उपलब्ध गराउन सकिने बताए । सेनाले अन्तर्राष्ट्रिय स्तरको फुटबल खेल आफ्नो मैदानमा खेलाउन सक्ने छ ।
स्रोतका अनुसार रंगशाला निर्माणमा १४ करोड खर्च लागेको छ । जसमध्ये एथ्लेटिक्स ट्र्याक निर्माणका लागि ८ करोड ६५ लाख र फुटबलमैदानका साथै रंगशाला बाउण्ड्रीका लागि ५ करोड ३५ लाख खर्च भएको छ । एथ्लेटिक्स ट्र्याकमात्रै ६ करोड मूल्य बराबरको छ ।
