२९ असार ०७४, काठमाडौं । कर्मचारी समायोजन विधेयक संशोधन दर्ताका लागि अनुमोदन भएको गोरखापत्रमा खबर छ ।
विधेयकका प्रावधान विभेदकारी भएको भन्दै कर्मचारी युनियनका प्रतिनिधिले आवाज उठाइरहेका बेला विधेयक संशोधनको महत्त्वपूर्ण प्रक्रियामा प्रवेश गरेको हो ।
अधिकांश सांसदले समेत विधेयकका प्रावधान सच्याइनुपर्ने माग सैद्धान्तिक छलफलमा उठाएका छन् । असार २५ गते संसदमा पेस भएको विधेयकमा अब सांसदले संशोधन दर्ताको समय पाउने छन् ।
संशोधन दर्ताका लागि संसद् सचिवालयले सूचना प्रकाशन गरेको ७२ घण्टाको समय सांसदले पाउनेछन् । संशोधनको समय बिहीबारदेखि सुरु हुनेछ ।
संशोधन दर्तापछि विधेयकमा दर्ता भएको संशोधनको सूचना सहितको विधेयक संसदमा नै पेस हुनेछ । संसद्ले विधेयकको दफाबार छलफल संसद्को पूर्ण बैठकमै पनि गर्न सक्ने छ । दफाबार छलफलका लागि सम्बन्धित समितिमा पठाउन पनि सक्ने नियमावलीमा व्यवस्था छ ।
संशोधनको सङ्ख्या धेरै भएमा पूर्ण बैठकले विधेयक सम्बन्धित समितिमा पठाउन सक्नेछ । प्रतिवेदन समितिले तयार पारेपछि पुनः संसद्को पूर्ण बैठकमा पेस हुनेछ । प्रतिवेदनसहित पेस भएको विधेयक पारितको प्रक्रियामा जानेछ ।
