दुईतिहाइको सरकारलाई अध्यादेश ल्याउनु पर्ने जरुरी नै थिएन – शेखर कोइराला

२८ माघ ०८१, भक्तपुर । वर्तमान सत्ता गठबन्धनका रहेका नेपाली कांग्रेसका नेता डा. शेखर कोइरालाले अध्यादेशबाट देश चलाउन खोज्नु गलत भएको बताएका छन् ।

भक्तपुरमा जिपि कोइराला फाउन्डेसनले सोमबार आयोजना गरेको ‘गिरिजाप्रसाद कोइराला र वर्तमान राजनीति’ विषयक विचार गोष्ठीमा नेता कोइरालाले यस्तो बताएका हुन् ।

‘दुईतिहाइको सरकारलाई अध्यादेश ल्याउनु पर्ने जरुरी नै थिएन । संसद्लाई छलेर जान खोजियो भने निरंकुशता हावी हुन्छ,’ उनले भने, ‘त्यसैले अध्यादेशबाट देश चलाउने संस्कार त्यागेर संसद्बाटै नियम, कानुन, ऐनहरू बनाइ अगाडि जानुपर्छ ।’

उक्त कार्यक्रममा नेपाली कांग्रेसकी नेत्री सुजाता कोइराला, नेता एनपी साउद, स्वास्थ्यमन्त्री प्रदीप पौडेल लगायतले गिरिजाप्रसाद कोइरालाको राजनीतिक योगदानको चर्चा गरेका थिए ।