२९ पुस ०७९, काठमाडौं । बागमती प्रदेशसभाको सभामुखमा भुवन पाठक निर्वाचित भएका छन् ।
शुक्रबार प्रदेशसभामा भएको निर्वाचनमा सत्तारुढ गठबन्धनका साझा उम्मेदवार पाठक ६२ मतका साथ सभामुखमा निर्वाचित भएका हुन् ।
एमाले र माओवादी केन्द्रले मुख्यमन्त्रीमा आलोपालो गर्ने सहमति गर्दा राप्रपाले सभामुख पाएसँगै राप्रपाका पाठकले सभामुख पाए ।
राप्रपा त्यही दल हो, जसले प्रदेश खारेजीको माग गर्दै चुनावमा मत मागेको थियो ।
बागमतीमा २७ सिट जितेको एमाले र २१ सिट जितेको माओवादीले मुख्यमन्त्रीमा आलोपालो गर्ने सहमति गरेको छ ।
सभामुखमा नेपाली कांग्रेसका शिवराज अधिकारी र नेपाल मजदुर किसान पार्टीकी सृजना सयजुले पनि उम्मेदवारी दिएका थिए ।
प्रदेशसभामा सत्ता गठबन्धनका उम्मेदवार पाठक ६२ मतका साथ निर्वाचित हुँदा उनको विपक्षमा ४९ मत खसेको थियो भने ७ जना तटस्थ बसेका थिए ।
सरकारलाई समर्थन गरेको एकीकृत समाजवादीका ७ प्रदेशसभा सदस्य सभामुखको निर्वाचनमा तटस्थ बसेका हुन् ।
