३० भदौ ०७४, काठमाडौं । भक्तपुरले घर पुनर्निर्माण सकाएका भूकम्पपीडितलाई तेस्रो किस्ताको एक लाख रुपैयाँ वितरण सुरु गरेको छ ।
ईएचआरपी भक्तपुरका अनुसार प्राधिकरणले विभिन्न चरणमा प्रमाणीकरण गरी पठाएका २७ हजार ५ सय ९८ लाभग्राहीमध्ये निजी आवास पुनर्निर्माणका लागि बिहीबारसम्म २२ हजार एक सय ७५ जनासँग अनुदान सम्झौता भइसकेको छ । जसमध्ये २१ हजार ४ सय ८० लाभग्राहीको खातामा पहिलो किस्ताको रकम जम्मा भइसकेको छ भने ५ सय ५९ को खातामा दोस्रो किस्ताको रकम जम्मा भएको छ ।
पहिलो किस्ता पाउन लाभग्राहीले जति चासो देखाएका थिए, त्यसको अनुपातमा दोस्रो र तेस्रो किस्ता लिन उत्साह नदेखाएको भट्ट बताउँछन् । दोस्रो किस्ताका लागि जिल्लाका चारवटै नगरपालिकाका एक हजार ६ सय ४२ लाभग्राहीले निवेदन दिएको भए पनि प्रमाणीकरण हुन बाँकी रहेको जनाइएको छ । लाभग्राहीको सूचीमा परेका जिल्लाका ८० दशमलव ३५ प्रतिशत भूकम्पपीडितसँग ईएचआरपी भक्तपुरले निजी आवास पुनर्निर्माणका लागि सम्झौता गरिसकेको जनाएको छ ।
लाभग्राहीको सूचीमा नपरेका वास्तविक भूकम्पपीडितको पुन: जाँच तथा सर्वेक्षण कार्य अन्तिम चरणमा पुगेको छ । जिल्लाका चार नगरपालिकामा २ हजार ६३ को पुन: जाँच र ८ सय भूकम्पपीडितको पुन: सर्वेक्षण भइरहेको छ । यसअघि लाभग्राहीको सूचीमा नपरेका र गुनासो फाराम भरेकाको पुन: जाँच, पुन: सर्वेक्षण गरिएको भट्टले बताए । जसमध्ये सूर्यविनायक नगरपालिकामा ५ सय ४८, चाँगुनारायण नगरपालिकामा ४ सय ९२, भक्तपुर नगरपालिकामा ७ सय १९ र मध्यपुर थिमि नगरपालिकामा ३ सय ४ भूकम्पपीडितको पुन: जाँच भइरहेको छ ।
लाभग्राहीको सूचीमा नपरेका र गुनासो फाराम भरेकामध्ये सूर्यविनायकमा ३ सय १४, चाँगुनारायणमा २ सय ७८ भक्तपुरमा १ सय ३१ र मध्यपुर थिमि नगरपालिकामा ७५ भूकम्प पीडितको पुन: सर्वेक्षण भइरहेको ईएचआरपीले जनाएको छ । भूकम्पपीडितको पुन: जाँच तथा पुन: सर्वेक्षणका लागि पुनर्निर्माण प्राधिकरण जिल्ला समन्वय समिति (एनआरए) भक्तपुरले सामाजिक ७ जना परिचालक तथा सहजकर्ता ७ र ७ जना इञ्जिनियर गरी १४ जनालाई तालिम दिई खटाएको आजको कान्तिपुर दैनिकमा खबर छ ।
