१ मंसिर, काठमाडौं । नेपाल सरकारले संविधान निर्माण प्रक्रियामा असहमति राख्दै मधेसमा भएको आन्दोलनका क्रममा ७४ जनाविरुद्ध लगाएको मुद्दा फिर्ता लिएको छ ।
तराईमा भएको आन्दोलनका क्रममा विभिन्न जिल्लामा गरी २ सय ८ जनाविरुद्ध मुद्दा दर्ता भएको थियो । त्यसमध्ये ७४ जनाविरुद्धको मुद्दा प्रचलित कानूनी व्यवस्था बमोजिम फिर्ता लिएको गृह मन्त्रालयले जनाएको छ ।
यस्तै मन्त्रालयले थप ९४ जनाविरुद्धको मुद्दा पनि फिर्ता लिने गृहकार्य थालेको गृह मन्त्रालयका प्रवक्ता बालकृष्ण पन्थीले जानकारी दिएएका छन् ।
गृह मन्त्रालयले थप २२ वटा मुद्दाहरुमा पूर्ण सफाइ दिएको समेत बताएको छ । पाँचवटा मुद्दामा भने प्रचलित कानूनबमोजिम कागजमात्र गराई छाडिएको मन्त्रालयद्वारा जारी विज्ञप्तिमा उल्लेख छ । यस्तै थप १३ वटा मुद्दाहरुको फर्छ्यौट भएको पनि मन्त्रालयले जनाएको छ ।
