संविधान संशोधनको विरोधमा नलाग्न कांग्रेस कार्यकर्तालाई निधिको निर्देशन

६ पुस, गुल्मी । गृहमन्त्री एवम् कांग्रेस नेता बिमलेन्द्र  निधिले संविधान संशोधनको विरोधमा नलाग्न आफ्ना कार्यकर्ताहरुलाई निर्देशन दिएका छन् ।

बुधबार गुल्मीको भाडगाउँमा आयोजित कार्यक्रममा मन्त्री निधिले एमाले संघीयता बिरोधी पार्टी भएको आरोप लगाउँदै – नेकपा एमालेको उक्साहटमा नलाग्न र पार्टी निर्णयको पक्षमा वातावरण बनाउन नेता कार्यकर्ताहरुलाई निर्देशन दिए ।

नेकपा एमालेले अनावश्यक आन्दोलन चर्काएको र संसदलाई समेत चल्न नदिएर संसदीय प्रणालीलाई अवरोध गरेको भन्दै उनले यसो गर्नु राष्ट्रियहित विपरित हुने टिप्पणी गरे । नेता निधिले एमालेलाई तुरुन्त संसद चल्न दिई मन नपरेका बिषयमा छलफल गरी निकास खोज्न सुझाए ।

संविधानले गणतन्त्र, संघीयता, समावेशी, धर्मनिरपेक्षतालगायतका उपलब्धी संस्थागत गरेकाले त्यसको संरक्षण गर्न सबै पार्टी लाग्नुपर्ने बताउँदै, सरकारले ल्याएको सीमांकन हेरफेरको प्रस्ताव गुल्मी, अर्घाखाँची, पाल्पा, रुपन्देही लगायत जिल्लाबासीहरुकै हितमा रहेको दाबी गरे ।

मन्त्री निधिले गुल्मीमा भएको आन्दोलनमा घाइतेहरुप्रति स्वास्थ्य लाभको कामना गर्दै उपचारको व्यवस्था मिलाउन पहल गर्ने आश्वासन समेत दिए ।

कार्यक्रममा रक्षामन्त्री बालकृष्ण खाँडले सीमांकन हेरफेरमा जनताको असहमति आउनु स्वाभाबिक रहेको भन्दै पार्टी निर्णयलाई सर्बोपरि ठानेर अघि बढ्नुपर्ने बताए ।

कार्यक्रममा वनमन्त्री एवम् कांग्रेस नेता शंकर भण्डारी, वाणिज्य राज्यमन्त्री सुवर्ण ज्वारचन, कांग्रेस केन्द्रीय सदस्य पुष्पा भुसाल, ज्ञानेन्द्र कार्की, रुपन्देहीका सांसद अब्दुल रज्जाक, गुल्मी क्षेत्र नम्बर १ का सांसद डा. कृष्ण छन्तेल लगायत सहभागि थिए ।

 

  •  
  •  
  •  
  •  
  •  

तपाइको मत