एनटीभीको महाप्रबन्धकको पदपूर्ति हाललाई यथास्थितिमा राख्न सर्वोच्चको आदेश

१३ पुस, काठमाडौं । नेपाल टेलिभिजनको महाप्रबन्धकको पदपूर्तिको प्रक्रिया हाललाई यथास्थितिमा राख्न सर्वोच्च अदालतले आदेश दिएको छ ।

प्रधानन्यायाधीश सुशीला कार्कीको एकल इजलासले नेपाल टेलिभिजनका कार्यकारी समाचार सम्पादक राजेन्द्रराज तिमिल्सिनाले सर्वोच्च अदालतमा दायर गरेको रिट निवेदनको पहिलो सुनुवाइबाट महाप्रबन्धकको पदपूर्ति प्रक्रिया यथास्थितिमा राख्न आदेश दिएको हो ।

यही पुस १९ गते दुवै पक्षलाई अन्तरिम आदेश सम्बन्धमा छलफल गर्न बोलाएकोे छ ।

तिमिल्सिनाले रिट निवेदनमा लोकसेवा आयोगबाट पदपूर्ति प्रक्रिया सञ्चालन गर्न माग गर्दै निजी क्षेत्रका आमसञ्चारमा सात वर्ष काम गरेका व्यक्तिले दरखास्त हाल्न पाउने तर नेपाल टेलिभिजनमा सोभन्दा लामो अवधि काम गरेका वरिष्ठ अधिकृतले आवेदन गर्न नपाउने गरी बनाइएको मापदण्ड खारेज माग गरेका छन् ।

यसअघिको प्रतिस्पर्धामा भाग लिएको आफूलाई नयाँ मापदण्डले विभेद गरेको रिट निवेदक तिमिल्सिनाको जिकिर छ ।

सूचना तथा सञ्चार मन्त्रालयअन्तर्गतका निकायका पदाधिकारीको योग्यता र नियुक्तिसम्बन्धी मापदण्ड–२०७३ र त्यसको पहिलो संशोधनले नेपाल टेलिभिजनका अधिकृत र वरिष्ठ अधिकृतलाई आवेदन गर्न नपाउने व्यवस्था गरेको रिट निवदेनमा उल्लेख छ ।

  •  
  •  
  •  
  •  
  •  

तपाइको मत