भुकम्प पीडितलाई सहुलियत दरमा काठ उपलव्ध गराउन पुनर्निर्माण प्राधिकरणको निर्देशन

१० चैत, काठमाडौं । राष्ट्रिय पुनर्निर्माण प्राधिकरणका प्रमुख कार्यकारी अधिकृत गोविन्दराज पोखरेलले भूकम्प प्रभावित जिल्लामा घर निर्माणका लागि सहुलियत दरमा काठ उपलव्ध गराउन बन मन्त्रालय र सरोकारवाला निकायलाई निर्देशन दिएका छन् ।

भूकम्प प्रभावितहरुले काठको अभावमा घर बनाउन नसकेको गुनासो गरेपछि कार्यकारी अधिकृत पोखरेलले वन मन्त्रालयका सचिव, वन विभागका महानिर्देशक र टिम्बर कर्पोरेशनका महाप्रवन्धकलाई प्राधिकरणमा बोलाएर यस्तो निर्देशन दिएका हुन् ।

उनले भूकम्प पीडितहरुका लागि सहुलियतमा दिने भनिएको काठ बितरणको प्रक्रिया सहज बनाएर अति प्रभावित १४ जिल्ला सदरमुकामसम्म ढुवानी गर्ने व्यवस्था मिलाउन समेत निर्देशन दिएका छन् ।

सो क्रममा मन्त्रालय सचिव, वन विभागका महानिर्देशक लगायत सरोकारवाला निकायका पदाधिकारीहरुले आवश्यक गृहकार्य गरी जतिसक्दो छिटो भूकम्प प्रभावित जिल्लामा सहुलियत दरमा काठ उपलव्ध गराउन प्रतिवद्धता जनाएका छन् ।

  •  
  •  
  •  
  •  
  •  

तपाइको मत