जापानी राजकुमारीद्वारा सर्वसाधारणसँग विवाह गर्न शाही हैसियत त्याग गर्दै !

quint-hindi2017-057058a562-bc28-4ecd-bbf3-12d0b4ea84bbf49e3c7d-45f3-4b73-b7f0-6e33894e284d

टोकियो । जापानी शाही परिवारकी सदस्य राजकुमारी माकोले एक सर्वसाधारण नागरिकसँग विवाह गर्नका लागि आफ्नो शाही हैसियत त्याग गर्न लागेको समाचार बाहिरिएको छ ।

यतिबेला प्रेमकै लागि जापानी राजकुमारी माकोले विशेष त्याग गरेको समाचारले विश्वको ध्यान खिचेको छ ।

जापानी सम्राट अकिहितोकी जेष्ठ नातिनी २५ वर्षे माकोले अध्ययन गर्ने क्रममा भेटिएका कानुनी फर्ममा काम गर्ने २५ वर्षकै केइ कोमुरोसँग सम्बन्ध जोड्न लागेकी हुन् ।

जापानको शाही कानुन अनुसार सर्वसाधारणसँग विवाह गरेमा राजकुमारीले शाही परिवार त्याग गर्नुपर्ने भएकाले राजकुमारी माकोले शाही हैसियत त्याग गर्न लागेको बिबिसीले जनाएको छ ।

टोकियोस्थित अन्तर्राष्ट्रिय क्रिश्चियन विश्वविद्यालयमा अध्ययन गरिरहेका बेला राजकुमारी माको र कोमुरोबीच सन् २०१२ मा एउटा रेस्टुरेन्टमा भेट भएको थियो ।

राजकुमारीसँगको विवाह योजना बारे बिबिसीको प्रश्नमा कोमुरोले अहिले त्यसबारे टिप्पणी गर्न नमिल्ने बताउँदै उचित समय आएपछि प्रतिक्रिया दिने बताए ।

जापानको राजपरिवार इम्पेरियल हाउसहोल्डले राजकुमारीको विवाहपूर्व इन्गेजमेन्टको तयारी बारे योजना भइरहेको बताएको स्थानीय सञ्चारमाध्यमले जनाएका छन् ।

जापानको सार्वजनिक प्रसारक एनएचकेका अनुसार राजकुमारी र कोमुरोबीच अर्को वर्ष विवाह हुने अपेक्षा गरिएको छ ।

जापानी राजपरिवारको इतिहासमा राजकुमारी माकोकी फूपू राजकुमारी सायाकोले पनि सन् २००५ मा सर्वसाधारण नागरिकसँग विवाह गरेर पहिलोपटक शाही परिवारकी सदस्य सर्वसाधारण नागरिक बनेकी थिइन् ।

  •  
  •  
  •  
  •  
  •  

तपाइको मत