गतल बिल प्रस्तुत गरी पाँच अर्ब रुपैयाँ बराबरको क्षतिपूर्ति दाबी

काठमाडौं । ग्यास उद्योगीले सरकार र तत्कालीन उद्योग वाणिज्य तथा उपभोक्ता हित सम्बन्ध समितिसमक्ष गतल बिल प्रस्तुत गरी साढे पाँच अर्ब रुपैयाँ बराबरको क्षतिपूर्ति दाबी गरेको पाइएको छ ।

नेपाली नम्बर प्लेटका ग्यास बुलेट निर्माण र सञ्चालनका विषयमा उद्योगीले गलत तथ्यांक प्रस्तुत गरी सरकारसँग अबौं रुपैयाँ क्षतिपूर्ति माग गरेका हुन् ।

नेपाली नम्बर प्लेटका बुलेट भारतमा निर्माण गर्न लगाएका उद्योगी नेपाल ग्यास उद्योग संघले तयार नै नभएको बुलेटको पनि राज्यसँग क्षतिपूर्ति माग गरी आपूर्ति ठप्प पार्ने चेतावनी दिँदै आएको छ ।

नेपाल आयल निगम स्रोतका अनुसार हालसम्म दुईवटा बुलेट निर्माण भएर राजधानी आइपुगेका छन् । एभरेस्ट ग्यास उद्योगका सञ्चालक शिव घिमिरेले गत मंसिर १६ गते ना ७ ख ९२७ र ना ७ ख ९२८ नम्बरका दुईवटा नेपाली नम्बर प्लेटका बुलेट नेपाल भित्र्याएका थिए ।

त्यसपछि हालसम्म नेपाली नम्बर प्लेटका कुनै पनि बुलेट ल्याइएको छैन । तर संघले चार सयको संख्यामा स्वदेशी नम्बर प्लेटका बुलेट तयार भएको भन्दै सरकारलाई गलत तथ्यांक प्रस्तुत गरेको छ ।

‘सञ्चालन प्रक्रियामा अवरोध आएर भारतमा अड्किएको भन्दै सरकार र संसदीय समितिको बैठकमा साढे पाँच अर्ब रुपैयाँ क्षतिपूर्ति माग गरियो’, तत्कालीन आपूर्तिमन्त्री शिवकुमार मण्डलले भने, ‘आन्तरिक रूपमा छानबिन गर्दा ग्यास व्यवसायीले बदमासी गरेर दुई/चारवटा नेपाली नम्बर प्लेटका बुलेटलाई चार सय भनेर सरकारबाट क्षतिपूर्ति माग गरेको फेला पर्‍यो ।’

चार सयको संख्यामा बनेर थन्किएको भनेर व्यवसायीले माग्दै आएको क्षतिपूर्ति पूर्ण रूपमा राज्यसँग ठगी गर्ने नियत भएको अन्नपूर्ण पोष्टमा खबर छ ।

संघको तथ्याङ्क नै फरक

नेपाल ग्यास उद्योग संघका अध्यक्ष गोकुल भण्डारीले अनुमति लिइएका सात सय ७५ मध्ये ६० वटा मात्रै बुलेट तयार भएर भारतमा थन्किएको बताएका छन् ।

सिप्रदीमार्फत थप चार सय च्यासिसको बुकिङ भएको र एक सय ५० को संख्यामा बुलेटको ट्यांक निर्माणको क्रममा रहेको भण्डारीले जानकारी दिए ।

  •  
  •  
  •  
  •  
  •  

तपाइको मत