चीन भ्रमण गरेका विदेशीलाई अमेरिका भ्रमण प्रतिबन्ध

२० माघ ०७६, काठमाडौं । चीनले कोरोना भाइरस संक्रमणलाई लिएर अमेरिकाले आतंक सिर्जना गरेको बताएको छ ।

अमेरिकाले दुईहप्ता यता चीन भ्रमण गरेका कुनै पनि विदेशीलाई आफ्नो देश भ्रमणमा प्रतिबन्ध लगाउने घोषणा गरेसँगै चीनले यस्तो प्रतिक्रिया जनाएको हो ।

चिनियाँ विदेश मन्त्रालयका प्रवक्ता हुवा चुङयिङले सोमबार पत्रकार सम्मेलन गर्दै अमेरिकाले सहयोग गर्नुको साटो उल्टै आतंक बढाउने काम गरेको बताएकी थिइन् ।

अमेरिकाले गत शुक्रबार मात्रै स्वास्थ्य संकटकाल घोषणा गर्दै दुई हप्तायता चीन भ्रमण गरेका विदेशीलाई आफ्नो देश भ्रमणमा प्रतिबन्ध लगाउने घोषणा गरेको थियो ।

अमेरिकाले स्वास्थ्य संकटकाल घोषणा गरेपछि अष्ट्रेलियाले पनि चीन भ्रमण गर्नेलाई प्रतिबन्ध लगाएको छ ।

जनवरी ३० तारिखमा विश्व स्वास्थ्य संगठनले कोरोना भाइरसका कारण स्वास्थ्य संकटकाल घोषणा गरेको थियो ।

चीनमा हालसम्म कोरोना भाइरसको कारण ३ सय ६१ जनाको मृत्यु र करिब १७ हजार संक्रमित रहेको जनाइएको छ ।

  •  
  •  
  •  
  •  
  •