चैत्र ६ गतेदेखि सञ्चालन हुने एसईई परीक्षा नरोकिने

४ चैत्र ०७६, काठमाडौं । सरकारले चैत्र ६ गतेदेखि सञ्चालन हुने माध्यमिक शिक्षा परीक्षा (एसईई) नरोक्ने भएको छ ।

शिक्षा, विज्ञान तथा प्रविधिमन्त्री गिरिराजमणि पोखरेलले मंगलबार अपील जारी गर्दै परीक्षा सञ्चालनको सबै तयारी पूरा भएकाले ६ देखि १७ चैतसम्म हुने परीक्षामा देशभरका कुल ४ लाख ८२ हजार २१९ परीक्षार्थी सहभागी हुने र १ हजार ९९५ परीक्षा केन्द्र तोकिएको जानकारी गराएका छन् ।

पर्याप्त सावधानी अपनाएर परीक्षा सञ्चालन र व्यवस्थापन गर्न लागिएको बताउँदैँ मन्त्री पोखरेलले अपीलमा भनेका छन् – ‘विद्यार्थीहरुलाई परीक्षा केन्द्रमा स्वास्थ्य सहायता प्रदान गर्न प्रत्येक परीक्षा केन्द्रहरुमा परीक्षा अवधिभर हेल्थ डेस्क राख्ने प्रबन्धका लागि ७५३ वटै स्थानीय तहहरुलाई अनुरोध गरिसकिएको छ ।’

मन्त्रालयले विद्यार्थीहरुलाई साबुन पानी प्रयोग गरेर हात धुन, मास्क प्रयोग गर्न, अरुसँग हात नमिलाउन र सकभर भीड भाडमा नजान आग्रह गरेको छ । साथै परीक्षा केन्द्रमा अनावश्यक रुपमा जम्मा भएर भीडभाड नगर्न पनि सबैलाई अपील गरेको छ ।

  •  
  •  
  •  
  •  
  •