२३ साउन ०७४, काठमाडौं । अविरल वर्षासँगै बगेको पहिरोमा परी रसुवाको उत्तरगया गाउँपालिका–४ पैरेबेशीमा एकै घरका चारजना हराइरहेका छन् भने घाइते अवस्थामा चार जनालाई उद्धार गरिएको छ ।
आइतबार राति बेलुकी करिब ९ बजेतिर आएको पहिरोमा परी बेपत्ता हुनेमा ७२ का धर्मबहादुर थापामगर, उनकी बुहारी मुना थापामगर, नाति रविन थापामगर र घरमा काम गर्ने भक्तबहादुर थापामगर हराइरहेका छन् ।माथिबाट निरन्तर पहिरो झर्ने क्रम जारी रहेकाले उनीहरुको उद्धारमा पुगेको नुवाकोट र रसुवाको नेपाल प्रहरी र श्रीनाथ गण देवीघाटबाट गएको नेपाली सेनाको टोलीलाई कठिनाइ भएको छ ।
पहिरोमा परी घाइते भएका चारजना मध्ये रुद्र थापामगर र देवकी थापामगरको अवस्था गम्भीर छ । चारै जना घाइतेको नुवाकोटको मनकामना शान्तिबजारतर्फ लगेर स्थानीय स्वास्थ्य संस्थामा उपचार भइरहेको छ । उनीहरुलाई उपचारका लागि अस्पताल ल्याउन पहिरोले सडक अवरुद्ध रहेको र आवत जावतमा समेत कठिनाइ भएको छ ।
अहिले स्थानिय बासिन्दा, नेपाल प्रहरी, नेपाली सेना र सशस्त्र प्रहरीले पहिरो पन्छाउने र बेपत्ताको खोजी गर्ने काम भइरहेको छ । रातिको समयमा पहिरो आएकोले उद्दार गर्न समेत कठिनाई भएको स्थानीय बासिन्दाहरुले बताएका छन् ।
