९ असोज ०७४, काठमाडौं । सरकारसँग विभिन्न माग राख्दै आन्दोलनमा उत्रिएका चिकित्सकहरुले सोमबार बिहानैदेखि स्वास्थ्य मन्त्रालय घेरेका छन् ।
सरकारले नेपाल चिकित्सक संघको मागलाई हेल्चक्र्याइ गरेको भन्दै चिकित्सकहरुले मन्त्रालय घेरेका हुन् । राजधानी बाहिरका जिल्लाका चिकित्सकहरुले भने सिडियो कार्यालय घेरेर देशैभरी बिरोध जनाइरहेको संघका उपाध्यक्ष डा. ढुन्डीराज पौडेलले बताए ।
चिकित्सकहरुको सुरक्षाका लागि सरकारले तत्कालै स्पष्ट कानुन बनाउनुपर्ने, अस्पतालभित्र उनीहरुमाथि हुने आक्रमण गर्नेलाई कानुनी तथा जेल सजाय हुनुपर्ने उनीहरुको माग राखेका थिए । उपचारका क्रममा बिरामीको मृत्यु भएमा चिकित्सक स्वयंले मृतकका परिवारलाई क्षतिपूर्ति दिनुपर्ने निर्णय भने सरकारले फिर्ता लिएको छ ।
अर्कातिर आन्दोलिनका कारण ओपीडी बन्द भएसँगै अस्पताललमा बिरामी अलपत्र परिरहेका छन् । तत्काल ज्यान जान सक्ने खालका बिरामीको मात्र अस्पतालको इमर्जेन्सी कक्षबाट उपचार गरिरहेका चिकित्सकहरुले बताए ।
डा. श्रेष्ठले ‘जानाजान कोही डाक्टरले बिरामी मार्दैन, छिटफुट घटना हुँदा प्रमाणबिनै डाक्टरमाथि हातपात र अस्पताल तोडफोड गर्नेलाई पनि सजाय हुनुपर्छ,’ भन्दै ‘चिकित्सक र उपभोक्ता दुवैको हित हुने गरी कानुन निर्माण गर्नुपर्छ, एक पक्षलाई हुने गरी मात्रै होइन । यसै विषयमा कुरा नमिलेको हो,’ भने ।
सबै माग पुरा नभएसम्म निर्णय नसच्याएसम्म अनिश्चितकालीन आन्दोलन जारी राख्ने उनीहरुको अडान छ ।
