१३ जेठ ०७४, काठमाडौं । माओवादी निकट पत्रकारहरुले शहीद कृष्ण सेन ‘इच्छुक’को १५औं स्मृति दिवसको अवसरमा आयोजित प्रभातफेरी कार्यक्रम संयुक्त रुपमा मनाएका छन् ।
आज शनिबार नेकपा माओवादी केन्द्र निकट प्रेस सेन्टर नेपाल, विप्लव माओवादी निकट क्रान्तिकारी पत्रकार संगठन, मोहन वैद्य किरण नेतृत्वको माओवादी निकट क्रान्तिकारी पत्रकार महासंघ र बाबुराम भट्टराई नेतृत्वको नयाँ शक्ति नेपाल निकट नेपाल प्रेस सोसाइटीले शहीद इच्छुकको १५औं स्मृति दिवस संयुक्त रुपमा मनाएका हुन् ।
बानेश्वरबाट बिहान ७ बजे सुरुभएको प्रभातफेरी बिजुलीबजार, बबरमहल हुँदै माइतीघर मण्डलामा पुगेर कोण सभामा परिणत भएको थियो ।
कोणसभामा इच्छुकको स्मृतिमा स्थापना गरिएको यस वर्षको ‘कृष्ण सेन इच्छुक स्मृति राष्ट्रिय पत्रकारिता पुरस्कार–२०७४’ बेपत्ता कलम–योद्धा सिन्धुली पोष्ट साप्ताहिकका तत्कालिन सम्पादक चित्रनारायण श्रेष्ठको सम्मानमा उनको जीवनसंगीनी सावित्रा श्रेष्ठलाई प्रदान गरिएको छ । साथै, पत्रकार दिपेन्द्र रावललाई पनि कार्यक्रममा सम्मान गरिएको छ ।
कार्यक्रममा शहीद ‘इच्छुक’का जीवनसंगीनी तक्मा केसी, पत्रकार महासंघका अध्यक्ष डा.महेन्द्र विष्ट, प्रेस सेन्टरका उपाध्यक्ष गोविन्द आचार्य लगायत वक्ताहरुले कृष्ण सेन ‘इच्छुक’ले देखाएको बाटोमा अघि प्रतिवद्धता व्यक्त गरे ।
