२० साउन ०७४, जाजरकोट । कामै नभएको कामको पनि काम भएको भनी रकम भुक्तानीका लागि सिफारिस गर्ने त्रिवेणी नलगाड नगरपालिका वडा नं ११ का वडा अध्यक्षसहित चार जना वडा सदस्य फन्दामा परेका छन् ।
नेकपा एमालेबाट निर्वाचित वडा अध्यक्ष जितबहादुर मल्ल र सदस्यहरु भिमबहादुर मल्ल, कृष्णकुमारी खत्री वानियाँ, विष्णुकमारी नेपाली र विर्खबहादुर बानियाँले वडा कार्यालयको लेटर प्याडमा ९० मिटर मात्र खनिएको बाटोलाई दुई हजार तीन सय मिटर खनिएको र काम पनि सन्तोषजनक भएको भन्दै भुक्तानीका लागि स्थानिय विकास अधिकारीलाई सिफारिस गरेपछि फन्दामा परेका हुन् ।
एक राष्ट्रिय दैनिकमा कागजमै सिमित योजना, कामै नगरी भुक्तानी भएको २३ लाखको चेक भेटियो शीर्षकको समाचार ३ साउनमा प्रकाशित भएपछि छानबिन गर्दा सम्बन्धित वडाका जनप्रतिनिधि समेत अनियमित कार्यमा संलग्न भएको पाइएको हो ।
जाजरकोटका त्रिवेणी नलगाड नगरपालिका वडा नं ११ चौखादेखि वडा नं १० रजिक सम्म जोड्ने चौखा-रजिक बानियाँगाँउ सर्मी डोल्पा सडकको कामै नगरी २३ लाख रुपैया जिल्ला समन्वय समितिले भुक्तानी गरेको थियो ।
नक्कली विल भरपाई पेश गर्ने प्राविधिक वर्खास्त, निर्देशन दिने जिल्ला इन्जिनियर भने मुक्त !
घर्तीले कामै नभए पनि नक्कली विल भरपाई पेश गर्ने जिल्ला प्राविधिक कार्यालयका प्राविधिक बलबहादुर विश्वकर्मालाई जागिरबाटै वर्खास्त गरिएको बताए ।
त्यस्तै उपभोक्ता समितिका अध्यक्ष लगबहादुर बस्नेत, सचिव शुष्मा विसी र कोषाध्यक्ष जय कुमारी खत्रीलाई पनि स्पष्टीकरण सोधिएको छ । निर्वाचित भएको एक सय दिन नवित्दै वडाका सवै पदाधिकारी स्पष्टीकरणमा परेका छन् ।
स्थानिय तहमा जनप्रतिनिधि चुनिए सँगै अनियमितता घटने सुशासन कायम हुने अपेक्षा गरिएको थियो तर यो पछिल्लो घटनाले जनप्रनिधिको चरित्र र हैसियत उदाङ्गिएको सुशासनकर्मी बालकुमार शर्माले बताए ।
उपभोक्तासँग आर्थिक लेनदेनका आधारमा जिल्ला प्राविधिक कार्यालयका प्रमुख तथा इन्जिनियर सुर्यबहादुर शाहीको निर्देशनमा सवईन्जिनियर विश्वकर्माले उक्त सडकको मुल्यांकन गरी नक्कली विलभरपाई बनाएको खुल्न आएको छ ।
घटना सार्वजनिक भएपछि कामै नगरेको सडकमा भुक्तानी दिईसकेको चेक समेत कार्यालयले थुतेर क्यान्सिल गरेको छ । तर, अनियमित कार्यमा संलग्न अन्यलाई कारवाहीको प्रक्रिया अघि बढाएपनि जिल्ला इन्जिनियर शाहीलाई कुनै कारवाही गरिएको छैन ।
