१८ चैत्र ०७४, काठमाडौं । नेपाली काँग्रेसका नेता तथा पूर्वगृहमन्त्री खुमबहादुर खड्काको निधनको शोकमा पार्टीले ५ दिन औपचारिक कार्यक्रम नगर्ने निर्णय गरेको छ ।
आइतबार बसेको कांग्रेस केन्द्रीय कार्यसमितिको बैठकले खड्काको निधनको शोकमा ५ दिन औपचारिक कार्यक्रम नगर्ने निर्णय गरेको हो । बैठकले खड्काको निधनले कांग्रेस र देशलाई अपूरणीय क्षति भएको ठहर गर्दै खड्काप्रति उच्च सम्मान प्रकट गर्दै चैत्र २२ गतेसम्म कार्यालय बन्द गर्ने निर्णय गरेको छ ।
७ दिनसम्म पार्टीको आधा झण्डा झुकाउने र १३ दिनसम्म शोक पुस्तिका राख्ने कांग्रेसले बताएको छ । १३ औं दिनमा केन्द्र र सबै जिल्लामा शोकसभा आयोजना गरिनेछ ।
शुक्रबार निधन भएको उनको पार्थिव शरीर शनिबार राति काठमाडौं ल्याइएको थियाे ।
सानेपास्थित निवासबाट आइतबार केन्द्रीय कार्यालयमा अन्तिम श्रद्धाञ्जलीका लागि राखिएकाे थियो । पार्टी कार्यालयबाट अन्त्येष्टिका लागि सिधै पशुपति आर्यघाट लगिने कार्यक्रम तय भएको कांग्रेस केन्द्रीय कार्यालयले जनाएको छ ।
