८ फागुन ०७४, पोखरा । कास्कीको विजयपुर खोलाको पुल नजिक बम विस्फोट हुँदा २ जना सामान्य घाइते भएका छन् ।
मंगलबार बम विस्फोटमा परी प्रहरी जवान कुलबहादुर खत्री र पत्रकार घनश्याम पाण्डे घाइते भएका हुन् ।
विजयपुरमा राखिएको शंकास्पद वस्तुको नजिक पुगेर पत्रकार पाण्डेले फोटो खिच्ने क्रममा फ्ल्यास बाले पछि उक्त शंकास्पद वस्तु विस्फोट भएको कास्की प्रहरी प्रमुख एसपी अशोक सिंहले बताए । विस्फोटका कारण घाइते भएका २ जनालाई प्रहरीले उपचारका लागि गण्डकी मेडिकल कलेज लगिएको छ ।
यसैबीच पोखराको नागढुंगा र शान्ती स्तुप नजिक पनि झोलामा राखिएको शंकास्पद वस्तु नेपाली सेनाले निष्क्रिय पारेको छ । नागढुंगामा शंकास्पद वस्तु भेटिएपछि एक घन्टा जति सडक अवरुद्ध भएको थियो ।
विराटनगरमा आयोजित कार्यक्रमस्थलबाट आफ्ना कार्यकर्तालाई प्रहरीले पक्राउ गरेको विरोधमा आज विप्लव माओवादीले देशव्यापी बन्द आह्वान गरेको छ । बन्दैकै समयमा वम विष्फोट भएकाले यसमा पनि सोही पार्टीको हात हुन सक्ने जनाइएको छ ।
