१९ भदौ ०७७, सप्तरी । जिल्लाको राजविराज नगर क्षेत्रमा चोरी गर्ने समूहका एक जनालाई चोरी गरेर भाग्दै गरेको अवस्थामा स्थानीयले पक्राउ गरी केहीबेर खम्बामा बाँधेर प्रहरीलाई बुझाएका छन् ।
मंगलबार राति राजविराज १० बिरोल चौकस्थित रामकिशुन यादवको घरमा चोरी गरी मोटरसाइकल चढेर भाग्न खोज्दै गर्दा राजविराज नगरपालिका १ बस्ने २५ वर्षिय मो. मुस्ताक मियाँलाई स्थानीयले घेरा हाली सामानसहित पक्राउ गरेर प्रहरीलाई बुझाएको हो ।
चोरी गरेर भाग्दै गर्दा स्थानीयले घेरा हाली समातेर डोरीले बाँधिदिएका मो. मुस्ताक मियाँ । तस्बिर : देवराम
समूहमै चोरी गर्ने गिरोहका अन्य सदस्य भने अँध्यारोको फाइदा उठाउँदै फरार भएका छन् ।
स्थानीयले चोरी गर्ने मियाँलाई समातेर केहीबेर बाँसको खम्बामा बाँधेर राखेका थिए । उनलाई प्रहरीको जिम्मा लगाइएको वडा अध्यक्ष चन्दशेखर चौधरीले जानकारी दिए ।
मियाँको साथबाट यादवको घरबाट चोरी गरिएका चाँदीका गरगहाना तथा चोरीका लागि प्रयोग गर्ने उपकरण लगायतका सामान बरामद गरिएको प्रहरी निरीक्षक सन्तोष खडकाले जानकारी दिए ।
प्रहरीले मियाँमाथि थप अनुसन्धान भइरहेको जनाएको छ । साथै, स्थानीयले फरार भएकाहरुलाई समेत पक्राउ गरी आवश्यक कारवाही गर्नुपर्ने बताएका छन् ।
