सशस्त्र प्रहरी, नेपाल प्रहरी, नेपाली सेना र उद्धारमा खटिएका स्थानीयले त्रिशुली नदीमा हराइरहेको जीपलाई निकालेका थिए । घाइते निरन्जनको काठमाडौंस्थित ट्रमा सेन्टरमा उपचार भइरहेको छ ।
जिप तीब्र गतिका रहेका कारण दुर्घटना भएको हुन सक्ने घटनास्थलको प्रारम्भिक अनुसन्धानमा देखिएको धादिङका प्रहरी प्रमुख ध्रुवराज राउतले बताए । उनल भने, ‘दुर्घटना स्थल हेर्दा सवारी साधन आइरहेकै दिशाबाट सडक छेउको कल्भर्ड भत्काएर नदीमा पुगेको देखिएको छ, राति ३ बजेतिर दुर्घटना भएकाले गर्दा सवारी चालक निदाएका पनि हुन सक्छन्, घटनाबारे विस्तृत अध्ययन भइरहेको छ ।’
यसैबीच त्रिशूलीमा हराइरहेकाको खोजीका लागि गएका शसस्त्र प्रहरी विपद व्यवस्थापन तालिम केन्द्र कुरिनटारका गोताखोर तारानाथ चापाई पनि पानीमा डुबेर गम्भीर घाइते भएका छन् । उनको राजमार्ग सामुदायिक अस्पताल मलेखुमा प्राथमिक उपचारपछि थप उपचारका लागि नेपाली सेनाको हेलिकप्टरबाट काठमाडौं पठाइएको छ ।
दुर्घटनापछि घटनास्थलको स्थलगत अवलोकन र उद्धार कार्यको अवलोकन गर्न सिंचाइ मन्त्री सन्जय गौतम, सिंचाई राज्यमन्त्री अमर पुन, मन्त्रालयका कर्मचारी, धादिङका प्रमुख जिल्ला अधिकारी श्यामप्रसाद भण्डारी, प्रहरी उपरीक्षक धुब्रराज राउत, विभागका कर्मचारी, र आफन्त घटनास्थलमा पुगेका थिए ।
उता हराइरहेका रामानन्द यादवका छोरा सन्तोष यादवको खोजीका लागि राजमार्गका विभिन्न प्रहरी चौकीलाई नदी आसपासका किनारामा परिचालन गरिएको जिल्ला प्रहरी कार्यलय धादिङले जनाएको छ ।
