१४ कार्तिक ०७७, म्याग्दी । जिल्लाको गलेश्वर बेनी सडकखण्डमा जीप दुर्घटना हुँदा एक जनाको मृत्यु भएको छ भने चालकसहित ११ जना घाइते भएका छन् ।
जिल्लाको रघुगंगा गाउँपालिका–६ ठाडाखानीबाट सदरमुकाम बेनीतर्फ आउँदै गरेको ध १ ज ८९६ नम्बरको जीप बेनी नगरपालिका–८ र ९ को सीमानामा दुर्घटना हुँदा अन्नपूर्ण गाउँपालिका–२ भूरुङ तातोपानीकी १० वर्षीय रिया बि.क.को मृत्यु भएको हो ।
बेनी अस्पतालका सूचना अधिकारी प्रकाश सुवेदीका अनुसार वि.क.को बेनी अस्पतालमा उपचारका क्रममा मृत्यु भएको हो । यस्तै तीन गम्भीर घाइतेलाई थप उपचारका लागि पोखरा रिफर गरिएको छ ।
सुवेदीले रिफर गरिएका घाइतेहरुमध्ये रघुगंगा गाउँपालिका–६ का ३० वर्षीय चालक नन्दलाल छन्त्याल, ८ वर्षीय दीक्षा शेरपुजा र बेनी नगरपालिका–८ का ४२ वर्षीय दलप्रसाद गौचन रहेको बताए ।
अन्नपुर्ण गाउँपालिका–२ की ४२ टकमायाँ बिक, रघुगंगा गाउँपालिका–६ का ३० वर्षीय बसन्त छन्त्याल, ५० वर्षीया अप्सरा पाइजा, २० वर्षीय सिर्जना शेरपुञ्जा, ४० वर्षीय ठककुमारी शेरपुञ्जा, १४ वर्षीय दिवा शेरपुञ्जा, चालककी श्रीमती मायाँ छन्त्याल र ७ वर्षीय इच्छा शेरपुञ्जा घाइते भएको र उनीहरुको बेनी अस्पतालमा उपचार भइरहेको छ ।
यस्तै जिल्ला प्रहरी कार्यालय म्याग्दीका सूचना अधिकारी इन्सपेक्टर डाक्टर प्रसाद चौधरीले गाडी सडकभन्दा तल कालिगण्डकी किनारमा पुगेको र दुर्घटनाको कारण बारेमा अनुसन्धान भइरहेको जानकारी दिए ।
