२० फागुन ०७४, काठमाडौं । टीकापुर घटनाका मुख्य आरोपी तथा कैलाली क्षेत्र नं १ बाट निर्वाचित सांसद् रेशम चौधरीसहित २४ जना बन्दीले कारागारमा अनशन सुरु गरेका छन् ।
टीकापुर घटनाका मुख्य आरोपी चौधरीसहित टीकापुर काण्डमा पुर्पक्षका लागि थुनामा रहेका २४ जना अनशनमा बसेको हुन् ।
सांसद् चौधरीले संसदमा शपथ लिन पाउनुपर्ने, टीकापुर घटनाका सबै बन्दीलाई रिहाइ गर्नुपर्नेलगायतका माग राखी साँझ ५ बजेर ४० मिनेटदेखि अनशनमा बसेको कैलाली प्रहरी प्रवक्ता सागर बोहराले बताए ।
लामो समयदेखि फरार रहेका सांसद् चौधरीले गत १४ गते कैलाली जिल्ला अदालतमा आत्मसमर्पण गरेका थिए । कारागार प्रशासनले भने यस विषयमा अहिलेसम्म कुनै जानकारी दिएको छैन ।
