१९ मंसिर ०७४, ताप्लेजुङ । जिल्लाको आठराई त्रिवेणी गाउँपालिकामा तीन घरमा आगलागी हुँदा लाखौंको क्षति भएको छ ।
मंगलबार आठराई त्रिवेणी गाउँपालिका-३ मा दिउँसो करिब १ बजे लागेको आगोले स्थानीय रुपनारायण याक्सो, देवमान याक्सो र ईन्द्रकुमारी याक्सोको घर जलेर नष्ट हुँदा लाखौंको क्षति भएको हो ।
घरमा कोही नभएको समयमा अचानक लागेको आगलागीको कारण घरसहित घरमा भएका लत्ताकपडा, खाद्यान्न, रुपनारायणको १० लाख, देवमान याक्सोको १२ लाख र ईन्द्रकुमारीको एक तोला सुन सहित १५ लाख बराबरको क्षति भएको प्रहरीले बताएको छ ।
घरका बालबालिका सबै विद्यालय गएको र अभिभावक पनि खेतमा काम गर्न गएकाले आगलागीको कारण खुल्न नसकेको प्रहरीले बताएको छ ।
घरमा जोडेको विद्युत सर्ट भई आगलागी भएको हुन सक्ने प्रहरी र स्थानीयको अनुमान रहेको छ ।
