२९ बैशाख ०७४, प्यूठान । भिंगृ इलाका प्रहरी कार्यालय प्यूठानको प्रहरी हिरासतमै एक युवाले आत्महत्या गरेका छन् ।
शुक्रबार बिहान स्वर्गद्वारी नगरपालिका–५ उपल्लो सारीका भुपेन्द्र गिरीले कपडाको पासो लगाएर हिरासतको शौचालयमा आत्महत्या गरेका हुन् ।
हिरासतसँगै रहेको शौचालयमा गिरीले बिहान करिब ३ बजे आत्महत्या गरेको प्यूठान प्रहरी प्रमुख डिएसपी रञ्जित सिंह राठौरले जानकारी दिए ।
शौचालय गएका गिरी लामो समयसम्म नआएपछि शौचालय खोलेर हेर्दा झुण्डिरहेको अवस्थामा फेला परेको प्रहरीले जनाएको छ । तर, परिवारले भने गिरीले आत्महत्या गरेको अस्वीकार गरेको छ । गिरीको परिवारले भने प्रहरीले नै हत्या गरेको दाबी गरेको छ ।
श्रीमतीलाई कुटपिट गरेको उजुरीपछि बिहीबार मात्रै प्रहरीले गिरीलाई नियन्त्रणमा लिएको थियो । घटनाको थप अनुसन्धानका लागि जिल्ला प्रहरी कार्यालय खलंगाबाट प्रहरी नायव उपरिक्षक राठौर बिहानै भिंगृ पुगेका छन् ।
