२० साउन ०७४, बागलुङ । बागलुङको विभिन्न ठाउँमा गएको पहिरोका कारण एक जनाको मृत्यु र पुरिएर पाँच जना वेपत्ता भएका छन् ।
ढोरपाटन नगरपालिको अधिकारीचौर पाखापानीमा पहिरोमा पुरिएर ५४ वर्षीय ओमप्रकाश बिकको मृत्यु भएको छ भने घरमाथिबाट आएको पहिरोले बिकसहित पाँच जनालाई पुरिएको थियो ।
बिकका तीन छोरी र श्रीमतीलाई स्थानीयले उद्धार गरेपनि बिकलाई बचाउन नसकिएको स्थानीयले बताएका छन् ।
यस्तै पहिरोले निसीखोला गाउँपालिकाको देविस्थानस्थित बाहुनगाउँका मनिराज छन्त्यालको घर पुर्दा चार जना वेपत्ता भएका छन् ।
स्थानीय कविर विश्वकर्माका अनुसार पहिरोले निसीखोलाको देविस्थानमा बढी क्षति पुर्याएको छ, बिहान मात्र देविस्थानका गोगलाल मल्लको घर खोलाले बगाएको छ भने देविस्थान स्वास्थ्यचौकी सहित दर्जनौं घर बाढी पहिरोको उच्च जोखिममा छन् ।
पहिरो प्रभावित क्षेत्रमा प्रहरी पठाइएको बागलुङका प्रहरी प्रमुख चन्द्रकुवेर खापुङले जानकारी दिए पनि पहिरोका कारण सडक अवरुद्ध भएपछि घटनास्थलमा प्रहरी पुग्न सकेको छैन ।
