१९ चैत्र ०७४, पोखरा। मणिपाल शिक्षण अस्पतालमा आन्दोलनरत कर्मचारी र प्रहरी बीच झडप हुदाँ ७ प्रहरी सहित केही आन्दोलनकारी घाइते भएका छन् ।
सोमबार आन्दोलनरत कर्मचारी अस्पताल प्रशासन अगाडि धर्नामा बसिरहेको बेला प्रहरीले हस्तक्षेप गरेपछि झडप भएको हो ।
प्रहरी र आन्दोलनकारीबीच केही बेर झडप भएको थियो । आन्दोलनकारीमध्ये २० जनालाई पक्राउ गरिएको र झडपका क्रममा ७ प्रहरी घाइते भएको कास्कीका प्रहरी प्रमुख एसपी अशोक सिंहले बताए ।
अस्पतालमा कार्यरत ननटिचिङ कर्मचारी ६ महिनायता तलब बृद्धि, विदा, स्थायी गर्नुपर्ने र विगतमा भएका सम्झौता कार्यान्वयन गर्नुपर्ने माग राखी आन्दोलनमा छन् ।
प्रहरीले स्वास्थ्यजस्तो संवेदनशील क्षेत्रमा अवरोध पुर्याउन खोजेको आरोप लगाएको छ भने आन्दोलनकारीले प्रहरीले धर्नामा हस्तक्षेप गरेको आरोप लगाएको छ ।
ढुङ्गा प्रहारबाट अस्पताल भवनका केही शिशा फुटेका छन् ।
