११ फागुन, राजविराज ।सरकारले संविधान संशोधन नगरी स्थानीय तहको निर्वाचन घोषणा गरेको विरोधमा संयुक्त लोकतान्त्रिक मधेशी मोर्चाले बुधबार गरेको मधेश बन्दका कारण जनजिवन प्रभावित बनेको छ ।
सप्तरी सदरमुकाम राजविराजका साथै जिल्लाका प्रमुख बजार हनुमाननगर, भारदह, शम्भुनाथ, कञ्चनपुर र कठौना लगायत पुर्णरुपमा बन्द रहे भने फाटफुट रुपमा खुलेका पसलहरु पनि मोर्चा कार्यकर्ताले बन्द गराएका थिए । बन्दकर्ताहरुले शैक्षिक संस्था, व्यापारीक प्रतिष्ठान, सरकारी कार्यलय, जिल्लाका प्रमुख बजारहरुबाट चल्ने लामो तथा छोटो दुरीका यातायात ठप्प पारेका थिए भने फाटफुट रुपमा मोटरसाइकल चलेका थिए ।
बिहानै देखि बजारका चौक चौकमा सरकार विरुद्ध चर्को नाराबाजी गर्दै हिडेका प्रदशनकारीहरुले बन्दको अवज्ञा गर्दै कार्यालय संञ्चालनमा ल्याएको भन्दै राजविराज नगरपालिका कार्यालय र जिल्ला शिक्षा कार्यालयमा ढुङ्गामुढा गर्दा दुवै कार्यालयको झ्यालको सिसाहरु फुटाउनुका साथैे जिल्ला निर्वाचन कार्यालयमा तालावन्दी समेत गरेका थिए भने पत्रिका, दुध बोक्ने गाडी, एम्बुलेन्स, अधिकारकर्मी र सञ्चारकर्मी चढेको गाडीलाई भने कुनै अवरोध गरेनन् ।
मोर्चाका नेताहरुले ठाउँ ठाउँमा विरोध सभा गर्दै मधेशको माग सम्बोधन नभएसम्म कुनै पनि निर्वाचन हुन नदिने र जबरजस्त लाडे कडा प्रतिकार गर्ने चेतावनी दिए ।
