देवराम यादव/१२ साउन ०७७, सप्तरी । जिल्लाको राजविराज नगरपालिका–६ स्थित न्यू सगरमाथा एग्रोभेट सेन्टरमा प्रहरीले छापा मारेर ७४ बोरा युरिया मलसहित एक जनालाई नियन्त्रणमा लिएको छ ।
आइतबार भन्सार छली गरी अवैधरुपमा भित्र्याएको युरिया मल भण्डारण गरी राखेको जानकारी पाएपछि एग्रोभेटमा छापा मारेर प्रहरीले करिब ५५ हजार मुल्य बराबरको ७४ बोरा युरिया मलसहित एकजनालाई नियन्त्रणमा लिएको हो ।
स्थानीय सूर्यनारायण यादवको घर तथा पसलमा खान तलासी गर्दा अवैधरुपमा ल्याइएको मल बरामद भएको जिल्ला प्रहरी कार्यालय सप्तरीले बताएको छ ।
जिल्ला प्रहरी कार्यालय सप्तरीका इन्स्पेक्टर सन्तोष खडेकाले यादवको पसल तथा पसल अगाडि रहेको स१ज ४६४ नं. को गाडीमा गरी कुल ७४ बोरा युरिया मल बरामद भएको जानकारी दिए ।
प्रहरीले गाडी चालक राजविराज नगरपालिका १५ का ४० वर्षीय महेन्द्र प्रसाद यादवलाई नियन्त्रणमा लिएर युरिया मल र गाडी चालकसहित भन्सार कार्यालय तिलाठीमा बुझाएको छ ।
