१३ असार ०७७, बुटवल । पूर्व–पश्चिम राजमार्ग अन्तर्गत रामनगरमा रोकिराखेको ट्रकमा पिकअप भ्यान ठोक्किएर भएको दुर्घटनामा भ्यानमा सवार दुई जनाको मृत्यु भएको छ ।
गएराति राजमार्गमा रोकिराखेको ना ६ ख ६२४ नम्बरको ट्रकमा बा १४ च ६८७९ नम्बरको पिकअप भ्यान ठोक्किएर भएको दुर्घटनामा बुटवल–११ कालिकानगरका २१ वर्षीय सुशील कुवार र सियारी गाउँपालिका–६ अमुवाका २२ वर्षीय रोशन गुरुङको मृत्यु भएको हो ।
वडा प्रहरी कार्यालय रामनगरले पश्चिमबाट पूर्वतर्फ जाँदै गरेको गाडी ट्रकमा ठोक्किँदा गुरुङको घटनास्थलमै र कुवारको लुम्बिनी प्रादेशिक अस्पताल बुटवलमा उपचारका क्रममा मृत्यु भएको जानकारी दिएको छ ।
भ्यानका चालक बुटवलका २५ वर्षीय गोपाल दंगाल सामान्य घाइते भएको जानकारी दिँदै प्रहरीले सवारी साधन र चालकलाई नियन्त्रणमा लिइएको बताएको छ ।
