२१ माघ ०७४, काठमाडौं । माओवादी केन्द्र अध्यक्ष पुष्पकमल दाहाल ‘प्रचण्ड’ले वाम एकता भाँड्नका लागि देशी विदेशी शक्तिहरु क्रियाशील रहेको बताएका छन् ।
आइतबार बिहान माओवादी विद्यार्थी संगठन अखिल (क्रान्तिकारी)का नेताहरुसँग दाहाल निवासमा भएको भेटमा अध्यक्ष दाहालले वाम एकता भाँड्नका लागि देशी विदेशी शक्तिहरु क्रियाशील रहेको बताएका हुन् । तर, त्यस्तो प्रयत्न कुनै हालतमा सफल हुन नदिने गरी एमाले अध्यक्ष केपी ओली र आफूले एकतालाई सफल बनाउन लागेको उनले दाबी गरे ।
अध्यक्ष दाहालले भने-‘वामपन्थीहरु मिलेदेखि नै यो एकतालाई भाँड्न देशी विदेशी शक्तिहरु क्रियाशील छन्, मेरो पछाडि र ओलीजीका पछाडि पनि कुदिरहेका छन् तर हामी दुबै जना त्यस्ता प्रयासलाई तोडेर जानेमा स्पष्ट छौं र एकतालाई टुंगो लगाउने तर्फ सक्रिय छौं ।’
अध्यक्ष दाहालले एकतासम्बन्धी सम्पूर्ण काम त तत्काल पूरा नहुने तर ठोस आधार भने सरकार निर्माण गर्नुअघि नै तयार गरिने जानकारी दिए । उनले राजनीतिक रुपमा कसरी एकता हुन्छ भन्ने चाहिँ माघ महिनाभित्रै टुंगोमा पुग्न बताए । सरकार गठनअघि नै हुने एकताले पार्टी र सरकार दुवैलाई बलियो बनाउने भएकाले सरकार गठन पहिले नै एकता गर्नेबारे पनि प्रयास भइरहेको दाहालले बताए ।
उनले दुई पार्टीबीचको एकता घोषणा चार/पाँच लाख मानिसहरुको सभामा हुने बताउँदै एकताको प्रमुख पक्ष संगठन व्यवस्थापन भएकाले दुबै दलले त्यो संवेदनशीलतालाई ध्यान दिएर गृहकार्य गरिरहेका बताए ।
