काठमाडौं । सरकारले यही पुस १ गते भारत र बंगलादेशको टोली सम्मिलित त्रिदेशीय ह्िवलचेयर क्रिकेट शृंखलाको उपाधि जित्ने नेपाली टोलीलाई जनही एक लाख रुपैयाँबाट पुरस्कृत गर्ने भएको छ ।
बिहीबारको मन्त्रिपरिषद्को बैठकले उपाधि विजेता टोलीका खेलाडीलाई प्रोत्साहन गर्ने उद्देश्यले नगद पुरस्कारबाट सम्मान गर्ने निर्णय गरेको हो ।
‘ह्िवलचेयरमा बसेर क्रिकेट खेल्नु नै साहसिक काम हो । त्यसमा पनि देशलाई उपाधि नै दिलाउनु त अझ प्रशंसाको विषय हो’, प्रधानमन्त्री शेरबहादुर देउवाका प्रेस सल्लाहकार गोविन्द परियारले भने, ‘उहाँहरुले देशलाई दिनु भएको खुसी र देखाउनु भएको साहसको प्रशंसा गर्दै थप हौसला बढाउन सरकारले जनही एक लाख रुपैयाँले पुरस्कृत गर्ने निर्णय गरेको हो ।’
सरकारको निर्णयअनुसार उपाधि विजेता टोलीका १४ जना खेलाडी तथा प्रशिक्षक र व्यवस्थापकले जनही एक लाख रुपैयाँ पुरस्कार पाउने छन् ।
नेपाल ह्िवलचेयर क्रिकेट संघका अध्यक्ष छुल्टिम शेर्पाले सरकारको निर्णयबाट आफूहरु उत्साही भएको जनाएको छ ।
संघले आयोजना गरेको ह्िवलचेयर क्रिकेट अहिलेसम्मकै ठूलो अन्तर्राष्ट्रिय प्रतियोगिता हो ।
यसअघि दुईभन्दा बढी देश सम्मिलित प्रतियोगिता भएको थिएन ।
समूहगत चरणको खेलमा भारतलाई पराजित गरेको नेपालले फाइनलमा बंगलादेशलाई ५४ रनले हराउँदै उपाधि चुमेको थियो ।
‘नसोचेको सम्मान पाइयो । यो हामीलाई सरकारले दिएको ठूलो सम्मान हो । यो एउटा सकारात्मक नजिका रुपमा रहनेछ’, छुल्टिमले भने, ‘सरकारले अहिलेसम्म फरक क्षमता भएकाको खेलकुदका लागि केही नगरेको भन्ने आरोप लाग्दै आएको थियो तर, यो निर्णयले त्यो बुझाइलाई पनि परिवर्तन गर्नेछ ।’
